Кога ќе се спомне Скопје ми се будат чувства на нешто мое, нешто топло. Градот кој и покрај сите падови повторно се вивна ко феникс од пепелта и стана уште поубав. Град кој преживеал сè и сешто, но не секој го преживеал него.
Не сите имаат способност да се носат со динамиката на овој град и да уживаат во сите убави нешта кои што има да ги понуди.
Сум прошетал низ повеќе градови во Македонија и сите располагаат со своја убавина, сите се специфични на свој начин и вреди да се посетат. Сепак, некои луѓе не мислат така и секогаш имаат позитивен коментар за своето, а лош за туѓото.
Прв академски час и прво запознавање на студентите... Сите наоѓаат своја тема за разговор, а меѓу другото слушам како се отвора тема и за мојот град. Тешки зборови паѓаат, лоши зборови...Неубаво чувство...Се вртам и гледам како и дел од моите сограѓани го делат истото чувство со мене. Решавам да останам воздржан, но комуникацијата продолжува и понатаму , па како горд скопјанец тргнувам во акција и одбрана на својот роден град.
-Што не ти се допаѓа во Скопје освен тоа што не си имала среќа да бидеш родена токму овде? ја прашав.
Како и што очекував почна да го плука својот отров со изговор дека нејзиниот град е многу поубав за живеење, Скопје е нели полн со сељаци, сообраќаен метеж, сите што живееме тука се преценуваме...
Сепак, реалноста е малку поинаква. Секој сонува да живее во поголем град кој економски и инфраструктурно е поразвиен од останатите. Порастот на население сè повеќе се зголемува, а работните места се намалуваат. Луѓето од внатрешноста на земјата доаѓаат и нудат работна сила дури и за пониска дневница само да останат во главниот град.
Одат да студираат во факултетите и ги намалуваат шансите на останатите за стипендија. А факултетите во нивните градови зјаат празни. Со еден збор го намалуваат животниот стандард на главниот град.
Колешке, зошто токму твој избор беше да студираш во Скопје и твојата цел е да останеш и работиш тука, ако мојот град е толку лош како што го претставуваш?
Впрочем ако во Скопје живеат како што велиш „сељаци“ зошто и ти упорно сакаш да бидеш дел од нив? Вреди да се размисли, нели?
Диоген
Колумните објавени на Порталот ИДИВИДИ изразуваат лични мислења и ставови на авторот. Редакцијата на ИДИВИДИ се оградува од истите и во никој случај не се ставови на Порталот како медиум. Одговорноста за изнесеното во текстовите, стилот и начинот на изразување е исклучиво на авторот