Запалениот автомобил „сеат леон“ е на пратеничка на СДСМ од Виница, а се претпоставува дека е тоа сторено од незадоволни сограѓани по нејзиното вчерашно гласање за Законот за употреба на јазиците.
МВР информира дека рано утрово, во 1,20 часот на улицата „Славчо Стојменски", непознати сторители, откако претходно го скршиле стаклото на возилото со винички регистарски ознаки ја полеале внатрешноста на возилото со запалива течност и ја запалиле.
По овој настан, полицијата исто така информира дека врз основа на безбедносните проценки ги зголеми полициските патроли во неколку реони во неколку градови во државава. Зголемените патроли најверојатно се поради вчерашните случувања во Собранието.
„МВР ги следи тековните случувања и се прават редовни безбедносни проценки, врз основа на кои, согласно надлежностите, се преземаат соодветни мерки", велат од МВР.
Според информации од пратеничката група на СДСМ, тие се договориле да седат дома, да не се движат во јавност за да не иритираат.