Најбогатиот човек на светот Илон Маск го купи Твитер за 44 милијарди долари. Тој се нарекува себеси „апсолутист на слободата на мислата“ и има намера да дозволи сите да кажат сè. Тоа крие опасности, коментира новинарката на ДВ, Каролина Химој.
Илон Маск еднаш го опиша Твитер како „централен градски плоштад“. Место каде што луѓето се среќаваат и разговараат, каде телата комуницираат со пораки, значи клучно место за информирање. Милијардерот Маск е свесен за важноста на оваа социјална мрежа.
Прашањето е дали е свесен колкава одговорност презема сега? Зарем не треба да се работи само за профит? Дали Маск, како најуспешен претприемач на нашето време, ќе го инструментализира Твитер во своја полза?
Во некои медиумски настапи тој рече дека сака да го води Твитер како чисто приватна компанија. Според Маск, Твитер досега не направил доволно за да ја одбрани слободата на мислењето и секогаш ја модерирал содржината.
Но, како Маск ја разбира слободата на говорот? За да може секој да каже сè, дури и кога тоа силно противречи на вистината?
Маск постојано изјави дека се противи на исфрлање на луѓето од Твитер. Најпознат од овие типови е поранешниот американски претседател Доналд Трамп, кој беше забранет од платформата откако неговите обожаватели упаднаа во Капитол. Објаснувањето на Твитер беше дека пишувањата на Трамп носат ризик од „натамошно поттикнување насилство“.
Но, Маск не сака правила. Јасно кажа дека кога е тој газда нема да има повеќе исфрлање од мрежата. Најбогатиот човек на светот, тежок 270 милијарди долари, сака да го направи Твитер „социјален императив“ на слободата на говорот. Секој може да каже сè, така тоа го гледа Маск, кој себеси се опишува како „апсолутист на слободата на мислата“.
Сè уште е тешко да се замисли таков космос под Маск. Многупати на неговата сметка тој блокираше луѓе кои го критикуваа него или неговата компанија Тесла. Новинарите кои го критикуваат Маск често добиваат навреди преку неговата сметка.
Можно е Твитер во 21 век да е навистина централниот градски плоштад. Но, има неколку разлики: разговорот на плоштадот не е ограничен на 280 букви, како што се пораките на Твитер. Личен состанок дава многу повеќе информации.
Најважната разлика е што градскиот плоштад не е на еден човек, а од него не се шират лаги и глупости со таква брзина. Ако навистина нема правила под Маск, тоа ќе се интензивира, исто како и поделбата на општеството.